निमित्तानि निमित्तज्ञो दृष्ट्वा लक्ष्मणपूर्वजः
सौमित्रिम् सम्परिष्वज्य इदम् वचनम्ब्रवीत्

nimittāni nimittajño dṛṣṭvā lakṣmaṇapūrvajaḥ
saumitrim sampariṣvajya idam vacanambravīt

परिगृह्योदकम् शीतम् वनानि फलवन्ति च
बलौ घम् सम्विभज्येमम् व्यूह्य तिष्ठेम लक्ष्मण

parigṛhyodakam śītam vanāni phalavanti ca
balau gham samvibhajyemam vyūhya tiṣṭhema lakṣmaṇa

लोकक्षयकरम् भीमम् भयम् पश्याम्युपस्थितम्
प्रबर्हणम् प्रवीराणामृक्षवानररक्षसाम्

lokakṣayakaram bhīmam bhayam paśyāmyupasthitam
prabarhaṇam pravīrāṇāmṛkṣavānararakṣasām

वाताश्च कलुषा वान्ति कम्पते च वसुन्धरा
पर्वताग्राणि वेपन्ते पतन्ति च महीरुःआः

vātāśca kaluṣā vānti kampate ca vasundharā
parvatāgrāṇi vepante patanti ca mahīruḥāḥ

मेघाः क्रव्यादसम्काशाः परुषाः परुषस्वनाः
क्रूराः क्रूरम् प्रवर्षन्ति मिश्रम् शोणितबिन्दुभिः

meghāḥ kravyādasamkāśāḥ paruṣāḥ paruṣasvanāḥ
krūrāḥ krūram pravarṣanti miśram śoṇitabindubhiḥ

रक्तचन्दनसम्काशा संध्या परमदारुणा
ज्वलतः प्रपतत्येतदादित्यादग्निमण्डलम्

raktacandanasamkāśā saṃdhyā paramadāruṇā
jvalataḥ prapatatyetadādityādagnimaṇḍalam

दीना दीनस्वराः क्रूराः सर्वतो मृगपक्षिणः
प्रत्यादित्यम् विनर्दन्ति जनयन्तो महद्भयम्

dīnā dīnasvarāḥ krūrāḥ sarvato mṛgapakṣiṇaḥ
pratyādityam vinardanti janayanto mahadbhayam

रजन्यामप्रकाशस्तु सम्तापयति चन्द्रमाः
कृष्णरक्तांशुपर्यन्तो लोकक्षय इवोदितः

rajanyāmaprakāśastu samtāpayati candramāḥ
kṛṣṇaraktāṃśuparyanto lokakṣaya ivoditaḥ

ह्रस्वो रूक्षो।अप्रशस्तश्च परिवेषस्तु लोहितः
आदित्ये विमले वीलम् लक्ष्म लक्ष्मण दृश्यते

hrasvo rūkṣo|apraśastaśca pariveṣastu lohitaḥ
āditye vimale vīlam lakṣma lakṣmaṇa dṛśyate

रजसा महता चापि नक्षत्राणि हतानि च
युगान्तमिव लोकानाम् पश्य शसन्ति लक्ष्मण

rajasā mahatā cāpi nakṣatrāṇi hatāni ca
yugāntamiva lokānām paśya śasanti lakṣmaṇa

काकाः श्येनास्तथा नीचा गृध्राः परिपतन्ति च
शिवाश्चाप्यशुभान्नादान्नदन्ति सुमहाभयान्

kākāḥ śyenāstathā nīcā gṛdhrāḥ paripatanti ca
śivāścāpyaśubhānnādānnadanti sumahābhayān

शैलैः शूलैश्च खड्गैश्च विमुकैः कपिराक्षसैः
भविष्यत्यावृता भूमिर्मांसशोणितकर्दमा

śailaiḥ śūlaiśca khaḍgaiśca vimukaiḥ kapirākṣasaiḥ
bhaviṣyatyāvṛtā bhūmirmāṃsaśoṇitakardamā

क्षिप्रमद्यैव दुर्धर्षाम् पुरीम् रावणपालिताम्
अभियाम जवेनैव सर्वैर्हरिभिरावृताः

kṣipramadyaiva durdharṣām purīm rāvaṇapālitām
abhiyāma javenaiva sarvairharibhirāvṛtāḥ

इत्येवमुक्त्वा धन्वी स रामः सम्ग्रामधर्षणः
प्रतस्थे पुरतो रामो लङ्कामभिमुखो विभुः

ityevamuktvā dhanvī sa rāmaḥ samgrāmadharṣaṇaḥ
pratasthe purato rāmo laṅkāmabhimukho vibhuḥ

सविभीषणसुग्रीवाः सर्वे ते वानरर्षभाः
प्रतस्थिरे विनर्दन्तो धृतानाम् द्विषताम् वधे

savibhīṣaṇasugrīvāḥ sarve te vānararṣabhāḥ
pratasthire vinardanto dhṛtānām dviṣatām vadhe

इत्यार्षे श्रीमद्रामायणे आदिकाव्ये युद्धकाण्डे त्रयोविंशः सर्गः

ityārṣe śrīmadrāmāyaṇe ādikāvye yuddhakāṇḍe trayoviṃśaḥ sargaḥ